ಆ್ಯಪ್‌ನಂತೆ ಕಾಣುತ್ತಿದೆ. ಟ್ರ್ಯಾಪ್‌ನಂತೆ ಕಾರ್ಯನಿರ್ವಹಿಸುತ್ತದೆ.

ನಕಲಿ ಹೂಡಿಕೆ ಆ್ಯಪ್‌ಗಳು ಹೂಡಿಕೆದಾರರನ್ನು ಹೇಗೆ ಮೋಸ ಮಾಡುತ್ತಿವೆ - ಮತ್ತು ನೀವು ಹೇಗೆ ಸುರಕ್ಷಿತವಾಗಿರಬಹುದು

ಸೊಗಸಾದ ಮತ್ತು ವೃತ್ತಿಪರವಾಗಿ ಕಾಣುವ ಆ್ಯಪನ್ನು ಡೌನ್ಲೋಡ್ ಮಾಡುವುದನ್ನು ಊಹಿಸಿ. ಅದು ಏರಿಕೆಯ ಚಾರ್ಟ್‌ಗಳು, ರಿಯಲ್-ಟೈಮ್ ಡೇಟಾ ಮತ್ತು ನಿಮಗೆ ಮಾರ್ಗದರ್ಶನ ನೀಡುವ ಚಾಟ್‌ಬಾಟ್ "ಸಲಹೆಗಾರ"ರನ್ನು ಕೂಡಾ ತೋರಿಸುತ್ತದೆ. ಸುರಕ್ಷಿತ ಹೂಡಿಕೆಗಳು, ತ್ವರಿತ ಹಿಂಪಡೆಯುವಿಕೆ ಮತ್ತು "ಖಚಿತ" ಆದಾಯದ ಭರವಸೆ ನೀಡುತ್ತದೆ.

ನೀವು ಹೂಡಿಕೆ ಮಾಡುತ್ತೀರಿ.

ನಂತರ ಒಂದು ದಿನ, ಆ್ಯಪ್ ಕ್ರ್ಯಾಶ್‌ ಆಗುತ್ತದೆ. ಗ್ರಾಹಕ ಸಹಾಯವಾಣಿ ಸಂಖ್ಯೆ ಕೆಲಸ ಮಾಡುವುದಿಲ್ಲ. ನಿಮ್ಮ ಹಣ ಹೋಗುತ್ತದೆ ಮತ್ತು ಆ ವೇದಿಕೆ ಅಸ್ತಿತ್ವದಲ್ಲೇ ಇರುವುದಿಲ್ಲ.

ನೀವು ನಕಲಿ ಹೂಡಿಕೆ ಆ್ಯಪ್‌ನಿಂದ ಮೋಸ ಹೋಗಿದ್ದೀರಿ.

ನಕಲಿ ಹೂಡಿಕೆ ಆ್ಯಪ್‌ಗಳು ಯಾವುವು?

ನಕಲಿ ಹೂಡಿಕೆ ಆ್ಯಪ್‌ಗಳು ಮ್ಯೂಚುಯಲ್ ಫಂಡ್ ಹೂಡಿಕೆ, ಟ್ರೇಡಿಂಗ್ ಅಥವಾ ಸಂಪತ್ತು ರಚನೆಗಾಗಿ ಕಾನೂನುಬದ್ಧ ವೇದಿಕೆಗಳಂತೆ ಕಾಣಲು ವಿನ್ಯಾಸಗೊಳಿಸಲಾದ ಮೋಸದ ಮೊಬೈಲ್ ಅಪ್ಲಿಕೇಶನ್‌ಗಳಾಗಿವೆ. ಕೆಲವು ಜನಪ್ರಿಯ ಕಂಪನಿಗಳನ್ನು ನಕಲು ಮಾಡುತ್ತವೆ; ಇನ್ನೂ ಕೆಲವು ಯಾವುದೇ ಬೆಂಬಲ ಅಥವಾ ನೋಂದಣಿಯಿಲ್ಲದೆ ಸಂಪೂರ್ಣವಾಗಿ ನಕಲಿ ಆಗಿರುತ್ತವೆ.

ಅವರ ಗುರಿ ಸರಳವಾಗಿದೆ: ಅನುಮಾನಾಸ್ಪದ ಹೂಡಿಕೆದಾರರಿಂದ ಹಣ ಮತ್ತು ವೈಯಕ್ತಿಕ ಡೇಟಾವನ್ನು ಹೊರತೆಗೆದುಕೊಳ್ಳಲು.

ಭಾರತದಲ್ಲಿ, ಪ್ರತಿದಿನ ಸುಮಾರು 7,000 ಸೈಬರ್ ವಂಚನೆಗಳು ವರದಿ ಆಗುತ್ತವೆ. ಕೇವಲ 2024 ರಲ್ಲಿಯೇ, ಹೆಚ್ಚಿನ ಆದಾಯದ ಭರವಸೆಯನ್ನು ನೀಡುವ ನಕಲಿ ಹೂಡಿಕೆ ವೇದಿಕೆಗಳನ್ನು ಒಳಗೊಂಡ 1 ಲಕ್ಷಕ್ಕೂ ಹೆಚ್ಚಿನ ಪ್ರಕರಣಗಳು ವರದಿಯಾಗಿವೆ ಮತ್ತು ₹3,216 ಕೋಟಿಗಳಷ್ಟು ಹಣ ಮೋಸ ಮಾಡಿ ಅವುಗಳು ಮಾಯವಾಗಿವೆ. ಹೆಚ್ಚುವರಿಯಾಗಿ, 20,043 ಪ್ರಕರಣಗಳು ನಕಲಿ ಟ್ರೇಡಿಂಗ್ ಆ್ಯಪ್‌ಗಳಿಗೆ ಸಂಬಂಧಿಸಿದ್ದಾಗಿದ್ದು, ಅಲ್ಲಿ ನಕಲಿ ಫಾರೆಕ್ಸ್ ಅಥವಾ ಆಪ್ಷನ್ಸ್ ಟ್ರೇಡ್‌ಗಳ ಹೆಸರಿನಲ್ಲಿ ಜನರನ್ನು ವಂಚಿಸಲಾಗಿದೆ ಹಾಗೂ ಕ್ರಿಪ್ಟೋಕರೆನ್ಸಿಗೆ ಹಣವನ್ನು ಪರಿವರ್ತಿಸುವ ನೆಪದಲ್ಲಿ ₹1,420 ಕೋಟಿಗಳಷ್ಟು ಹಣವನ್ನು ದೋಚಲಾಗಿದೆ.

ಮೂಲ

ಇತ್ತೀಚಿಗೆ ಜುಲೈ 2025 ರಲ್ಲಿ, ತೆಲಂಗಾಣ ಸೈಬರ್ ಸೆಕ್ಯೂರಿಟಿ ಬ್ಯೂರೋ ನಕಲಿ ಹೂಡಿಕೆ ಆ್ಯಪ್‌ ಹಗರಣದಲ್ಲಿ ಭಾಗಿಯಾಗಿದ್ದ ಮೂವರನ್ನು ಹೈದರಾಬಾದ್‌ನಲ್ಲಿ ಬಂಧಿಸಿದೆ. ಅವರು ಅಮಾಯಕ ಹೂಡಿಕೆದಾರರಿಂದ ಸುಮಾರು ₹3.24 ಕೋಟಿಗಳನ್ನು ದೋಚಿದ್ದರು.

ಸುದ್ದಿ ವರದಿ

ಅವರು ನಿಮಗೆ ಹೇಗೆ ಮೋಸ ಮಾಡುತ್ತಾರೆ?

• ಸಾಮಾಜಿಕ ಜಾಲತಾಣದಲ್ಲಿ ನೀಡುವ ಪಾವತಿಸಲ್ಪಟ್ಟ ಜಾಹೀರಾತುಗಳು: "ವಿಶೇಷ" ಅಥವಾ "ಹೆಚ್ಚಿನ-ಆದಾಯದ" ಹೂಡಿಕೆಗಳನ್ನು ಪ್ರಚಾರ ಮಾಡುವುದು.

• ನಕಲು ಮಾಡುವುದು: ಸೆಬಿ-ನೋಂದಾಯಿತ ಮಧ್ಯವರ್ತಿಗಳಿಗೆ ಹೋಲುವ ಹೆಸರುಗಳು/ಲೋಗೋಗಳನ್ನು ಬಳಸುವುದು.

• ನಕಲಿ ಡ್ಯಾಶ್‌ಬೋರ್ಡ್‌ಗಳು: ನಂಬಿಕೆಯನ್ನು ನಿರ್ಮಿಸಲು ನಂಬಲಾಗದ ಆದಾಯ ಮತ್ತು ನಕಲಿ ಎನ್ಎವಿಗಳನ್ನು ತೋರಿಸುವುದು.

• ರೆಫರಲ್ ಸ್ಕ್ಯಾಮ್‌ಗಳು: ಸ್ನೇಹಿತರನ್ನು ಆಹ್ವಾನಿಸಲು ಕಮಿಷನ್‌ಗಳು ಅಥವಾ ರಿವಾರ್ಡ್‌ಗಳನ್ನು ಒದಗಿಸುವುದು.

• ಯಾವುದೇ ನೈಜ ಅನುಸರಣೆ ಇಲ್ಲ: ಯಾವುದೇ ಕೆವೈಸಿ ಇಲ್ಲ, ಸೆಬಿ ನೋಂದಣಿ ಇಲ್ಲ, ಯಾವುದೇ ರಕ್ಷಣೆ ಇಲ್ಲ.

ಕೆಲವರು "ಸಪೋರ್ಟ್ ನಂಬರ್‌ಗಳು" ಅಥವಾ ಹಣಕಾಸು ತಜ್ಞರೊಂದಿಗೆ ನಕಲಿ ವಿಡಿಯೋ ಚಾಟ್‌ಗಳನ್ನು ಸಹ ಒದಗಿಸುತ್ತಾರೆ.

ನಕಲಿ ಹೂಡಿಕೆ ಅಪ್ಲಿಕೇಶನ್‌ಗಳಿಂದ ನಿಮ್ಮನ್ನು ರಕ್ಷಿಸುವುದು ಹೇಗೆ

1. ಗೂಗಲ್ ಪ್ಲೇ ಸ್ಟೋರ್ ಅಥವಾ ಆ್ಯಪಲ್ ಆ್ಯಪ್ ಸ್ಟೋರ್ ರೀತಿಯ ಅಧಿಕೃತ ಮೂಲಗಳಿಂದ ಮಾತ್ರ ಆ್ಯಪ್‌ಗಳನ್ನು ಡೌನ್ಲೋಡ್ ಮಾಡಿ -ಎಂದಿಗೂ ಯಾರೋ ಕಳಿಸಿದ ಲಿಂಕ್‌ ಅಥವಾ ಫಾರ್ವರ್ಡ್ ಮೆಸೇಜ್‌ಗಳ ಮೂಲಕ ಡೌನ್ಲೋಡ್ ಮಾಡಬೇಡಿ.

2. ಈ ಅಧಿಕೃತ ಲಿಂಕ್ ಬಳಸಿ ಪ್ಲಾಟ್‌ಫಾರ್ಮ್ ಅಥವಾ ಮಧ್ಯವರ್ತಿ ಸೆಬಿ-ನೋಂದಣಿಯಾಗಿದೆಯೇ ಎಂದು ಪರಿಶೀಲಿಸಿ: 👉 ಸೆಬಿ | ಮಾನ್ಯತೆ ಪಡೆದ ಮಧ್ಯವರ್ತಿಗಳು

3. ಕಂಪನಿಯ ವೆಬ್‌ಸೈಟ್ ಪರಿಶೀಲಿಸಿ ಮತ್ತು ಅದು ಆ್ಯಪ್‌ನ ಹೆಸರು ಮತ್ತು ಸಂಪರ್ಕ ವಿವರಗಳಿಗೆ ಹೊಂದಿಕೆಯಾಗುತ್ತದೆ ಎಂಬುದನ್ನು ಖಚಿತಪಡಿಸಿಕೊಳ್ಳಿ.

4. ಖಚಿತ ಲಾಭವನ್ನು ನೀಡುವ ಆ್ಯಪ್‌ಗಳನ್ನು ನಂಬಬೇಡಿ-ಕಾನೂನುಬದ್ಧ ಹೂಡಿಕೆಗಳು ಎಂದಿಗೂ ಖಚಿತ ಲಾಭದ ಭರವಸೆ ನೀಡುವುದಿಲ್ಲ.

5. ಕೆವೈಸಿ ಇಲ್ಲದೆ ಹೂಡಿಕೆ ಮಾಡಬೇಡಿ. ಸೆಬಿ-ನೋಂದಾಯಿತ ವೇದಿಕೆಗಳು ಸರಿಯಾದ ಕೆವೈಸಿ ಪ್ರೋಟೋಕಾಲ್‌ಗಳನ್ನು ಅನುಸರಿಸುತ್ತವೆ.

6. ವೇಗವಾಗಿ ಕಾರ್ಯನಿರ್ವಹಿಸಲು ನಿಮ್ಮನ್ನು ಒತ್ತಾಯಿಸುವ ಆ್ಯಪ್‌ಗಳ ಬಗ್ಗೆ ಎಚ್ಚರಿಕೆಯಿಂದಿರಿ, ಹೆಚ್ಚಿನ ರೆಫರಲ್ ಕಮಿಷನ್‌ಗಳನ್ನು ನೀಡುವ ಅಥವಾ "ನಂಬಲು ಅಸಾಧ್ಯವಾದ" ಆದಾಯವನ್ನು ನೀಡುವವರ ಬಗ್ಗೆ ಎಚ್ಚರದಿಂದಿರಿ

7. ಹೆಚ್ಚುವರಿ ಭದ್ರತೆಗಾಗಿ 2FA (ಎರಡು-ಅಂಶಗಳ ದೃಢೀಕರಣ) ಸಕ್ರಿಯಗೊಳಿಸಿ ಮತ್ತು ನಿಯಮಿತವಾಗಿ ನಿಮ್ಮ ಬ್ಯಾಂಕ್ ಖಾತೆಯನ್ನು ಮೇಲ್ವಿಚಾರಣೆ ಮಾಡಿ.

ಕೊನೆಯ ಮಾತು: ಇದು ಕೇವಲ ನೋಟದ ಬಗ್ಗೆ ಅಲ್ಲ - ಇದು ಕಾನೂನುಬದ್ಧತೆಯ ಬಗ್ಗೆ

ಮೋಸದ ಆ್ಯಪ್‌ಗಳು ಅತ್ಯಾಧುನಿಕವಾಗಿ ಕಾಣಬಹುದು, ಆದರೆ ಅವುಗಳನ್ನು ನಿಮ್ಮ ಹಣ, ನಿಮ್ಮ ಡೇಟಾ ಮತ್ತು ನಿಮ್ಮ ಮನಸ್ಸಿನ ಶಾಂತಿಯನ್ನು ಕದಿಯಲು ವಿನ್ಯಾಸಗೊಳಿಸಲಾಗಿದೆ.

ಆದ್ದರಿಂದ ನೀವು ಕಷ್ಟಪಟ್ಟು ಗಳಿಸಿದ ಹಣದೊಂದಿಗೆ ಆ್ಯಪನ್ನು ನಂಬುವ ಮೊದಲು:
ತಡೆಯಿರಿ. ಚೆಕ್ ಮಾಡಿ. ವೆರಿಫೈ ಮಾಡಿ.

ಆಗಿರಿ ಆತ್ಮನಿರ್ಭರ್ ಇನ್ವೆಸ್ಟರ್, ಸುಮ್ಮನೆ ಡೌನ್ಲೋಡ್ ಮಾಡಬೇಡಿ-ಸರಿಯಾಗಿ ಪರಿಶೀಲನೆ ಮಾಡಿ.